Pitsaassuseq: Great Greenlandimi puisip amiinut pitsaassutsit 6 aallaavigalugit suleriuseqarpugut. A,B,C,D,E & ”kasiilikkat” amit. Puisi Kalaallit Nunaata imartaani miluumasuuvoq, arlaatigullu amimini kimillanneqarsinnaasarluni. Raajamit kiineqarsimasinnaavoq, saassussinermik kimillanneqarluni, qalipaataa allanngorsimalluni il.il. Taamaattumik ammit allat uumatitsivimmiitinneqarsimasut assigalugit inngilaq. 100%-imik pinngortitami uumasoq miluumasoq pineqarmat meqquisa takissusaat, qalipaataat puisillu angissusaat assigiissarneqarlutik aalajangersorneqarsinnaanngillat. 

Ameq A-mik pitsaassusilik QAQUTIGOORTORUJUSSUUVOQ qaatiguunullu takisuunik tunisassiornermut tamatigut atorneqassalluni. Ameq A-mik pitsaassusilik annerpaamik 2-nik annikitsunik kimillanneqarsinnaavoq. Taamattaaq ameq B-mik pitsaassusilik toqqagassaatitta akornanni aamma qaqutiguulersimavoq. Ameq B-mik pitsaassusilik ajoqutit 8-sut tikillugit annikitsunik kimillanneqarsinnaavoq (tamatigupajaaq raajanik kiitinnerit). Ameq C-mik pitsaassusilik taannaavoq Great Greenlandimi annertunerusumik nioqqutissiukkatsinnut atugarisarput. Ameq C-mik pitsaassusilik annikitsunik arlalippassuarnik anginernillu 1-2 ajoquteqarsinnaavoq. Taakku ajoqutit tunisassiornermi avaqqullugit suliarinninnerit ingerlanneqarsinnaapput. Ameq C-mik pitsaassusilik pinnersaanermi ilusilersuinermittaaq atorneqarsinnaavoq. Ameq D-mik pitsaassusilik annertuunik kimillanneqarsinnaasarpoq. Ameq D-mik pitsaassusilik meqqoqannginnersaqarsinnaasarpoq, ameqarluniluunniit manngertissimasumik. Taamaattumik ameq D-mik pitsaassusilik TAAMAALLAAT nioqqutissianut minnerusunut akunnapajaartumillu angissusilinnut atorneqarsinnaasarpoq, ajoqutigisat avaqqullugit tunisassiarineqarsinnaaniassammat. Ameq E-mik pitsaassusilik amerlu kasiiligaq ANNERTUUMIK ajoqusersimasarpoq. Taakku nioqqutissiornernut annikitsualunnut soorlu matuersaasivinnut, pinnersaatinut assigisaanullu taamaallaat atorneqartarput. 

A,B,C-mik pitsaassusillit ammit atisaliornermut, assassornermut, pinnersaanermilu ilusilersuinermut atorneqarsinnaasarput. D,E aamma kasiilikkat ammit ajoqusersimavallaartarneri peqqutaalluni pinnersaanermi sapinngisamik atorneqartanngillat. Ammit taakkua annikitsualunnik pinnersaasiornermi  ajoqutai avaqqullugit nioqqutissiarineqarsinnaapput. Ammit qalipaativia atorlugu ajoqutaasut ersarinnerusarneri maluginiassallugu pingaaruteqarpoq. Taamaattumik ammit misunneqarsimasut kusanarnerusarput, matumani ammip qalipaataa nammineerluni allanngorsimappat misunnerani aaqqinneqarsinnaasarmat. Taamattaaq ammimi misunnikumi raajanik kiitinnerit aamma ersernerlunnerusarput maluginiassallugit. Sungiusimanngikkaanni isigissallugit ilaatigut takujuminaalluinnarsinnaasarput malunnarnatilluunniit.

Ammit misunnikut: Great Greenland pingaarnertut ammit naliginnaasumik qalipaataat atorlugu tuniniagaqarpoq, taamaakkaluartorli ammittaaq qalipaatinut nuannarineqarluartunut nutaaliaasullu malillugit misuttarpagut. Amminik misussinissaq taamaallaat pisarpoq ammit qalipaataat allanngulaarsimagaangat. Taamaasilluni ameq igiinnarneqarnermiit misunnerani annanneqartarpoq, taamatullu tunisassiornermi piujuaannartitsinissaq qulakkeertarlutigu. Ameq pinnersumik qalipaateqareersoq misunneqarnissaminut pisariaqartinneqarneq ajorpoq. 

Allattooq/Aataaq: Allattooq aamma aataamik taaneqartarpoq qituttuunini ilisarnaatigisarlugu. Siilikitut qituttuuneranik nassuiarneqartarnera ammip isikkuanut tulluartorujussuuvoq – qaamalluni qituttuummat, kiisalu siilikitulli qinngorneqarluni. Allattooq pingaarnertut atisaliuutaasarpoq, taamaakkaluartoq aamma illup iluani pisattanut pinnersaataalluarsinnaalluni. 

Allattooq qasertumik qaamasumik qalipaateqarnini ilisarnaatigaa sukkullu tamaana assigiinngitsunik iluseqarsinnaasunik milaqarluni. Ammit ilai milattuujupput ilaalu milakinnerullutik.

Natseq: Natseq Natsiamik aamma taaneqartarpoq taannaavorlu amerlanerpaat Kalaallit Nunaannut pigitittagaat. Qitiatigut taarnersaa nunaqavissut atisarisartagaanni ukiuni 100-likkaani takusareerpagut, ulloq mannalu tikillugu ameq atisaliuutigineqartarpoq pisattanullu aamma pinnersaatitut sananeqartarluni. 
Natseq naliginnaasumik qasertoq qaamasumik qalipaateqarpoq kisiannili ammalortunik kimittuunik allaqartarluni qititaatigut, qalipaat qasertoq qaamasoq qerningajattorlu nikerarfigisarpai. Ameq assigiinngitsunik ilisarnaatinik taagorneqartarpoq, kusanartuujuaannarporli. Natserit ilaasa meqqui takisuujusarput (LH) ilaalu naatsunik meqqoqartarlutik (KH). Takinernik meqqullip meqqui malunnarnerusarput, naatsunillu meqqulik tunngarpasinnerusarluni. Natseq naatsunik meqqulik takisuunik meqqulimminngaanniik anginerusarpoq.

Ammit tamarmik EU-p puisit amiinut tunngatillugu inatsisaanut naapertuupput. Ugguuna EU-p pisortatigoortumik nittartagaatigut paasisaqarnerugit:
Ugguuna EU-p pisortatigoortumik nittartagaatigut paasisaqarnerugit:EU - The Official Seal Regime - Engelsk Ugguuna EU-p tamanut paasissutissiissutitut quppernera danskisut atuaruk: EU Sælordningen - Dansk

MALUGIUK: Amminik assiutigut tamarmik amminut pitsaassuseq C atorlugu assilisaapput. Ammit tamarmik immikkuullarissuseqarput, taamaattumillu angissutsimikkut qalipaataasalu qinngornerini nikerarsinnaallutik.

Kalaallit Nunaanni piniartut tapersersukkit. Great Greenland Kalaallit Nunaanni Namminersornerullutik Oqartussanit pigineqarpoq. Suliassatta pingaarnersaraat puisinniarluni inuussutissarsiuteqarnerup ingerlaannarnissaa. Great Greenlandimut niuerniaruit Kalaallit Nunaanni piniartut puisinniarnikkut ingerlaannaq tapersersussavatit – Kalaallit Nunaannut iluaqutaasussamik. Qujanarujussuaq.